18.04.2001 - 07:00
Belvès es una ciutat de Perigòrd, bastida al sud del Riu Dordonha, al ras de la linha de camin de ferre abandonada pauc a pauc per la SNCF. aquel país costeja una granda forest peirigòrda famosa pels contes, los que fan encara paur als gojats. Mas costeja, en bas de la còsta que puja al borg ancian, un riu pichon que portava al XIXen sègle electricitat d’en pertot a l’economia locala e segurament d’autras energias. A la debuta del XXen sègle s’establiguèt una filatura, puèi entre 45 e 60 se modernizèt lo luòc de produccion. La filatura es ligada a una liliara de produccion annexa a la lana de las fedas dels tucs carcinòls pròches. Per los païsans èra una produccion annexa, que pauc a pauc an desvalorizats. La lana de las fedas es pas que una seleccion especiala per aver lo típus de produits necites ; abandonar la seleccion es pensar que la lana de la feda es pus utila als òmes e son economia. Es vertat que la tecnologia a portat de produits de substitucion, la chimia es productritz e productivista. La volontat de l’associacion de la filatura de Belvès es de bastir, tornamai, la filiara de la lana dal Perigòrd e ajudar los païsans que pensan encara a la filiara. Mas, se vòlon bastir un musèu, los comptes serián engraissat de la moneda publica Conselh Regional e General. Mas, quina idèa : vòlon produire ! Alavètz, dins un canton que la diversitat es umana, mas que la reflexion politica es de la pensada unica pel torisme, es pron dificile de trapar l’ajuda que cal. Amai, los engatjaments politics dels fialadors ( demandatz Nicolas ) arrengan pas las causas, son de mond que sabon parlar e que son ni de drèita, ni de gaucha ; vòlon simplament trabalhar un produit en respectar al maximum l’environa e far viure lo país, sens li costar ! Es que lor projècte lor farà perdre una certana libertat ciutadana de poder pus parlar o boscular los ministres en visita ? Lor installacion en Nauta-Provènça a fait abandonar lo país de las visitas ministerialas e los cambiaments de prefèctes son nombroses… Lor es estat refusat un emplèc jove e l’ajuda de las comunautats de comuna ; mas, l’arribada d’una femna RPR a Belvès fariá cambiar las mentalitats conservatritz ? Que son pas forçadament de drèita !!!! Es un projècte economic que a besonh d’èstre lançat, tornamai, per poder viure mai de dos ans e per poder èstre sens besonh de subvencion al cap de dos ans… Es que lo personal politic installat en Perigòrd ne vòl ? Dison ben del desvelopament economic fòrças causas … Los nombroses visitors d’aquesta dimenjada se pausavan pas lo problèma ; an pogut apreciar las òbras dels artesans arcuelhits per la SCI de la filatura, dins los bastiments pron galhards que encamba un riu que demanda que de balhar energia…
