27.09.2013 - 06:00
Un grop d’aranesi partidaris dera independencia de Catalonha, ‘deuant deth procés encetat per un sector important dera societat civila catalana demanant eth dret a decidir e era independéncia’, considere que ‘cau qu’era societat aranesa prengue plena conciencia dera importancia d’aguest ahèr e comprengue eth besonh de posicionament’.
‘Èm molti aranesi e araneses es que compartim era conviccion qu’era Val d’Aran ei una comunautat de lengua e cultura occitana que forme part de Catalonha per voluntat pròpia des de hè ségles. Gràcies a d’açò, eth nòste país a aconseguit enes darreri ans ua importanta reconeishença des sòns drets lingüístics, culturaus e istorics, plasmada sustot ena reinstauracion des sues institucion istoriques d’autogovern e ena oficialisacion dera lengua occitana d’Aran’, ditz la nòta de convocacion a l’amassada constituenta dera Assemblada Nacionau Catalana en Aran, que se debanarà ath Centre Associatiu de Vielha-Mijaran a 22.00 e cèrca de constituir en Aran ‘un grop de sensibilizacion, difusion e sosten as accions dera ANC’.
Era iniciativa sociala aranesa es ‘dubèrta a totes es sensibilitats sociaus e politiques, damb er unic denominador comun dera conviccion qu’eth futur d’Aran va dera man deth procès constituent qu’a iniciat ua part importanta dera societat catalana’.
