Declaración de soberanía y el derechu de decidir del pueblu de Cataluña

  • Traducció en asturià

La premsa lliure no la paga el govern, la paguen els lectors


Fes-te de VilaWeb, fem-nos lliures

Preámbulu

El pueblu de Cataluña, a lo llargo de la so historia, manifestó democráticamente la voluntá d’autogobernase, col oxetivu d’ameyorar el progresu, el bienestar y la igualdá d’oportunidaes de tola ciudadanía, y pa reforciar la cultura propia y la so identidá colectiva.

L’autogobiernu de Cataluña encóntase tamién nos derechos históricos del pueblu catalán, nes sos instituciones seculares y na tradición xurídica catalana. El parllamentarismu catalán tien los sos fundamentos na edá media, coles asamblees de Pau i Treua y de la Cort Comtal.

Nel sieglu XIV créase la Diputación del Xeneral o Generalitat, que va alquiriendo más autonomía hasta actuar, a lo llargo de los sieglos XVI y XVII, como gobiernu del Principáu de Cataluña. La caida de Barcelona en 1714, pola guerra de Sucesión, fixo que Felipe V aboliera, col Decretu de Planta Nueva, el derechu públicu catalán y les instituciones d’autogobiernu.

Esti itinerariu históricu compartióse con otros territorios, fechu que configuró un espaciu común llingüísticu, cultural, social y económicu, con vocación de reforcialo y promovelo dende la reconocencia mutua.

A lo llargo de tol sieglu XX, la voluntá d’autogobernase de los catalanes y les catalanes foi una constante. La creación de la Mancomunidá de Cataluña en 1914 supunxo un primer pasu na recuperación del autogobiernu, qu’abolió la dictadura de Primo de Rivera. Cola proclamación de la Segunda República española constituyóse un gobiernu catalán en 1931 col nome de Generalitat de Catalunya, que se dotó d’un Estatutu d’Autonomía.

La Generalitat abolióse de nuevu en 1939 col xeneral Franco, qu’instauró un réxime dictatorial hasta’l 1975. La dictadura contó con una resistencia activa del pueblu y del gobiernu de Cataluña. Ún de los finxos de la llucha pola llibertá ye la creación de l’Asamblea de Cataluña nel añu 1971, previa a la recuperación de la Generalitat, con calter provisional, cola vuelta en 1977 del presidente nel exiliu. Na transición democrática, y nel contestu del sistema autonomista nuevu definíu pola constitución española del 1978, el pueblu de Cataluña aprobó al traviés de referéndum l’Estatutu d’Autonomía de Cataluña en 1979, y celebró les primeres elecciones al Parllamentu de Cataluña en 1980.

Nos últimos años, na vía de la profundización democrática, una mayoría de les fuercies polítiques y sociales catalanes impulsaron midíes de tresformación del marcu políticu y xurídicu. La más de recién, concretada nel procesu de reforma del Estatutu d’Autonomía de Cataluña principiáu pol parllamentu nel añu 2005. Les dificultaes y negatives de les instituciones del Estáu español, ente les cuales hai que destacar la sentencia del Tribunal Constitucional 31/2010, suponen una negativa radical a la evolución democrática de les voluntaes colectives del pueblu catalán dientro del Estáu español y crea les bases pa una involución nel autogobiernu, que güei s’espresa con total claridá nos aspectos políticos, competenciales, financieros, sociales, culturales y llingüísticos.

De munches maneres, el pueblu de Cataluña espresó la voluntá de superar l’actual situación de bloquéu nel senu del Estáu español. Les manifestaciones multitudinaries del 10 del xunetu del 2010, col lema ‘Somos una nación, nós decidimos’, y la de la 11 de setiembre del 2012, col lema ‘Cataluña estáu nuevu d’Europa’, son espresión del refugu de la ciudadanía hacia la falta de respetu a les decisiones del pueblu de Cataluña.

Con fecha 27 de setiembre del 2012, al traviés de la resolución 742/IX, el Parllamentu de Cataluña constató la necesidá de que’l pueblu de Cataluña pudiera determinar llibremente y democráticamente’l so futuru colectivu al traviés d’una consulta. Les últimes elecciones del Parllamentu de Cataluña del 25 de payares del 2012 espresaron y confirmaron esta voluntá de manera clara y inequívoca.

Pa llevar alantre esti procesu, el Parllamentu de Cataluña, axuntáu na primer sesión de la X llexislatura, y en representación de la voluntá de la ciudadanía de Cataluña espresada democráticamente nes últimes elecciones, formula la siguiente declaración de soberanía y el derechu de decidir del pueblu de Cataluña.

Declaración de soberanía y el derechu de decidir del pueblu de Cataluña

D’alcuerdu cola voluntá mayoritaria espresada democráticamente pol pueblu de Cataluña, el Parllamentu de Cataluña alcuerda principiar el procesu pa facer efectivu l’exerciciu del derechu a decidir pa que los ciudadanos y les ciudadanes de Cataluña puedan decidir el so futuru políticu colectivu, d’alcuerdu colos principios siguientes:

-Soberanía. El pueblu de Cataluña tien, por razones de llexitimidá democrática, carácter de suxetu políticu y xurídicu soberanu.

-Llexitimidá democrática. El procesu del exerciciu del derechu de decidir va ser escrupulosamente democráticu, garantizando especialmente la pluralidá d’opciones y el respetu por toos, al traviés de la deliberación y el diálogu dientro de la sociedá catalana, col oxetivu de que’l pronunciamientu que surda sía la espresión mayoritaria de la voluntá popular, que va ser la garantía fundamental del derechu de decidir.

-Tresparencia. Van facilitase toles ferramientes afayaices pa que’l conxuntu de la población y la sociedá civil catalana tenga tola información y la conocencia precisa pal exerciciu del derechu a decidir y poder promover la participación nel procesu.

-Diálogu. Va dialogase y va negociase col Estáu español, les instituciones europees y col conxuntu de la comunidá internacional.

-Cohesión social. Va garantizase la cohesión social y territorial del país y la voluntá espresada munches veces pola sociedá catalana de caltener Cataluña como un solu pueblu.

-Europeismu. Van defendese y van promovese los principios fundacionales de la Unión Europea, particularmente los derechos fundamentales de los ciudadanos, la democracia, el compromisu col estáu de bienestar, la solidaridá ente los pueblos d’Europa y l’apueste pol progresu económicu, social y cultural.

-Llegalidá. Van utilizase tolos marcos llegales existentes pa facer efectivu’l fortalecimientu democráticu y l’exerciciu del derechu a decidir.

-Papel principal del parllamentu. El parllamentu, como institución que representa’l pueblu de Cataluña, tien un papel principal nesti procesu y, por eso, va tenese qu’alcordar y concretar los mecanismos y les dinámiques de trabayu que garanticen esti principiu.

-Participación. El Parllamentu de Cataluña y el Gobiernu de la Generalitat tienen que facer partes actives en too esti procesu al mundu local, y al númberu máximu de fuercies polítiques, axentes económicos y sociales, y entidaes culturales y cíviques del nuestru país, y concretar los mecanismos que garanticen esti principiu.

El Parllamentu de Cataluña afala al conxuntu de ciudadanos y ciudadanes a ser partes actives y protagonistes d’esti procesu democráticu del exerciciu del derechu de decidir del pueblu de Cataluña.

Palaciu del Parllamentu, 23 de xineru del 2013

Recomanem

La premsa lliure no la paga el govern. La paguem els lectors.

Fes-te de VilaWeb, fem-nos lliures.

Fer-me'n subscriptor
des de 75€ l'any