Lengua Viua: 'Cau contunhar persutant tà qu’er usatge der aranés sigue present ena vida vidanta dera gent'

Eth Collectiu Lengua Viua celebre enguan 20 ans dera corsa Aran per sa Lengua, tostemp a trabalhat per usatge sociau der aranés. Neishec peth besonh d’enautir era lengua pròpria d’Aran. Dilhèu en aguesti 20 ans non auem artenhut deth tot aguest usatge, mès òc era valor sociau der aranés, pr’amor que fòrça nauvengudi trapen eth besonh d’aprener-lo, element important entara sua integracion.

Ath long d’aguesti 20 ans eth collectiu a hèt:

–Serades teatraus entara difusion e promocion dera lengua.

–Calendaris tamb arrepervèris, dites…

–Era corsa Aran per sa Lengua.

–Elements identificatius deth collectiu en tot mercar era identitat aranesa: mocadors, penjòlhs, polseres, samarretes, bambes, clauèrs, morralets, centures, paraigües, gòrres, pegasolets…

Es escòles deth país an er aranés coma lengua veïculara tamb er arreconeishement dera Generalitat e deth Conselh Generau d’Aran, mès ena societat cau contunhar persutant tà qu’eth sòn usatge sigue present ena vida vidanta dera gent.

Eth collectiu contunharà trabalhant en tot demanar ara Generalitat eth finançament entà poder desvolopar era Lei der aranés, occitan d’Aran, que siguec aprobada eth 22 de seteme de 2010, tient en compde era feblesa e es besonhs der aranés.

Corsa Aran per sa Lengua

Eth collectiu Lengua Viua torne a premanir ua naua edicion dera Corsa Aran per sa Lengua, en tot arribar ath numèro 20, que se hesteja uei ena plaça dera Glèisa de Vielha.

Es actes seràn parioni as des darrèri ans, damb es gessudes tradicionaus des de Montgarri en tot córrer o en tot caminar, des de Tredòs en tot caminar, des deth pòrt de Vielha en tot hèr-ne era trauèssa e des de Les en tot caminar. Atau coma es darrèri an, es qu'ac desiren compartiràn eth mòs que carregen en morralet en ua arturada en Unha e en Es Bòrdes respectiuament. Autant qu'enes darrères edicions en Arties e en Bossòst es bars Hiru e Urtau aufriràn fruta e aigua as participaires ena Corsa.

Lengua Viua venerà era samarreta dera Corsa d'enguan es dues darrères setmanes de junhsèga enes cubèrts der Ajuntament de Vielha. Era samarreta d'enguan pòrte eth diboish premiat en concors organizat peth collectiu, creat tà hèr-la mès participatiua. Era òbra guanhadora, ei de Pep Casasayas de Vielha, samarreta nera, igual qu’era edicion 10.

Tath torn des 20.15 ores ei prevista era arribada de toti es participants ena plaça. Se liegerà eth parlament deth collectiu, se prèmiarà a bèra institucion o persona restacada peth sòn trabalh ena promocion dera lengua pròpria d’Aran: er aranés.

Ara seguida acabarà tamb un concèrt deth grop Nadau, plan demorat per toti.

Collectiu Lengua Viua

• Xarxes socials
  • 
  • 
  • 
  • 
  • 
  • 
  • 
  • 
  • 
  • 
  • 
  • 
• Envia l'article
• Imprimeix l'article
• Converteix a PDF

Tweet